Ангилал: Шүлэг

Энэ загвар надад таалагдаж байна.Блог маань нэг л өөр гоё болчлоо.Ямар байна даа.Блогоо мялааж сэнгэнэсэн сайхан шүлэг нэгийг оруулнаа.Гадаа сэрүү татаж сэнгэнээл сайхан байна шүү тээ.Маш их таалагддаг нэгэн залуугийн шүлгээс оруулъя.Биш ээ, Залуу нь биш шүлгүүд  нь таалагддаг гэх гэж байгаа царай нь.

                           Би зураг
Өнгө дүрсгүй амьдралыг зурна гэж
Өөрөө би будаг шиг урсана
Өдөр бүхэн өөр өөр өнгөнд уусаж
Үнэндээ энэ амьдрал өөрийг минь зурна.
Ойрдоо намайг солгой гараар зураа юу
Орчлонд олон зүйлээр дутаачихаж
Одод атаархтал жингэнэдэг инээд минь алга
Омог бардам ширтдэг харцанд минь гал алга
Зүслэж болдоггүй сэтгэлийг минь
Бараан өнгөөр зураа юу
Зүйрлэвэл энэ лав гуниг биш
Зүггүй дурлалын сүүдэр ч биш
Зүрхэн дээр минь гортиг татсан
Зүгээр нэг зураас ч биш
Зүслэж болдоггүй сэтгэлд минь
Зүйрлэх юу ч үгүй болохоор
Зөвхөн энэ өнгийг бараан гэе.
Зөндөө хайлаа тэнд цэг алга.
Цээжинд жиргэдэг шувуу сэрсэнгүй
Цэнхэр хээтэй дурсамжаа олсонгүй
Бидэр татан зурагддаг тэр бүхнийг минь
Бийр салгах эгшиндээ хаа нэгтээ гээчихэж
Энэ амьдрал
Өөрөөр минь ертөнцийг зөндөө сараачсан атлаа
Өөрийн гэж өмчлөх хэдэн зураасыг минь
Өнгөгүй болтол баллуурдчихаж
Өрөөлийн өмнө одоо би
Өөрийгөө хүртэл танихгүй
Зураачийн бодолд би дутуу хойно
Зуун жил ч зурлаа гээд бүтэн болохгүй.
***                              ***                   ***
***                              ***                  ***
Эрт болсон явдлыг
Эргэж сөхөөд юүхэв
Эдгээгүй шарх сэдэрч
Эдлээгүй жаргал үгүйлэгдчихнэ
Эдүгээн бодол сэвтэж
Энгэр чанадад хөндүүрлэчихнэ
Эрт болсон явдлыг эргэж сөхөөд юүхэв
Тийм сайхан учралыг мартаад бас яахав
Танхил дурсамж өтөлж
Таамаг хүртэл урвачихна
Тарлан үнэн өгөршиж
Таацахын зүүд эзгүйрчихнэ
Тийм сайхан учралыг мартаад бас яахав
Бүтээгүй хайрын төлөө бэтгэрч гуниад юүхэв
Бүдэг сэтгэл сохорч
Бүсгүйн гоог гутаачихна
Би өөрөө мөхөж
Бүгдийн итгэлийг гээчихнэ
Бүтээгүй хайрын төлөө бэтгэрч гуниад юүхэв
Болоод өнгөрсөн хормыг бодлоо гээд яахав
Болохгүй тэр хайрыг өмчлөх гээд юүхэв.

Дамдинсүрэнгийн Дамдинжав